قصور الغدة الدرقية

يعتبر أشيع الأمراض التي تعالج في عيادات الغدد الصم، وهو يؤثر في النشاط اليومي والحالة النفسية للمريض قبل أن يعلم أنه مصاب بمرض حقيقي (قصور الغدة الدرقية).
تقع الغدة الدرقية بمستوى تفاحة آدم. وتكاد لا تجس إلا إذا كانت متضخمة.
وهي تصنع هرمون يسمى هرمون الغدة الدرقية. ويكاد هذا الهرمون يتدخل في كل العمليات الحيوية في الجسم.
لذلك فإذا أصاب الغدة الدرقية أي طارئ فإن اصطناع هذا الهرمون ينقص. وبالتالي تتلخبط شؤون الجسد.
فيما يلي تعداد لأعراض نقص هرمون الدرق (قصور الغدة الدرقية):
1.التعب العام والإرهاق الدائم.
2.الحساسية الزائدة للبرد (عدم تحمل البرد).
3.زيادة الوزن.
4.ضيق النفس على الجهد.
5.الإمساك.
6.جفاف الجلد.
7.خشونة الصوت.
8.آلام العضلات.
9.آلام المفاصل.
10.اضطراب الدورة الطمثية (طبعاً عند الإناث).
11.الاكتئاب.
حقيقة فإن معظم مرضى الغدة الدرقية هن من السيدات، والأعراض هي الموصوفة أعلاه، بس الفكرة(اسمحولي استخدم العامية) أنو كتير أحيان بتكون الشكاية بالبداية هي اضطراب الدورة الطمثية والمراجعة بتكون للعيادة النسائية، لهيدا الشي ضروري إذا كان في أعرا ض ثانية متل الامساك أو الانزعاج الزائد من البرد أو زيادة بالوزن، تحكي عنهن الست لطبيبها أو طبيبتها لحتى تقدر الطبيبة توجه الست للحل الأفضل. هلق بدهن الصبايا يعذروني لأني ما حأحكي عن هالمرض كتيرعندهن رغم أنو أشيع ........ خليكن معي
رح أحكي على الجانب الأهم بالنسبة إلي ويلي هو قصور الدرق عند الأطفال (قصور الدرق الولادي)، وبصراحة الفحوص المخبرية لنفي هيدا المرض عند الأطفال صارت فحوص روتينية لكل مولود في أوروبا وأمريكا، وفي سبب كتير وجيه لهيدا الشي ، والسبب أنو المرض علاجوا كتير سهل ومانو مكلف (علبة الدواء بتكلف بس 100 ل.س)، بس المصيبة أنو إذا ماتعالج المرض فنتائجوا ع الطفل وخيمة ، وبتتظاهر ب:
1.البلادة
2.بطء الحركة
3.البكاء الجش (يعني الخشن).
4.ضعف الرضاعة (ضعف القدرة على المص).
5.ضخامة اللسان.
6.رخاوة الطفل.
بجوز تتسأل بعد ما قرأت هالأعراض ، يبدو أنو المرض أعراضوا واضحة، ياترى ليش بالغرب بيفحصوا كل الأطفال يلي بولدوا، وكمان هيدا إلو سبب وجيه ، انو هرمونات الأم بتنتقل للطفل أثناء الحمل وهي الهرمونات بتكفي فترة ، فبيولد الطفل متل الفل طولوا ووزنو وجمالوا كل طبيعي ، بس التراجع بكون سريع وما بيظهر بصورة واضحة، والمشكلة انو هيدا من المشاكل يلي الوقت فيها ضدنا وكل يوم بيتأخر فيو التشخيص حتصير تبدلات (غير قابلة للتراجع)عند الطفل ، وساعتها ما حنمنع المشكلة بس ح نوقف انتقالا من سيء إلى أسوء.
طيب شو هو الأسوء ؟؟؟؟
بصراحة التبدلات يلي ما فينا نعكسها هي تبدلات بتتعلق يتطور الطفل من الناحيتين العصبية والحركية ، بمعنى أنو حتتأثر مقدرات التعلم عند الطفل وقدرتو ع التفاعل مع المحيط وهيدا منسمي بطب الأطفال (تأخر التطور الروحي الحركي) وفي الحالات يلي بيتأخر فيها التشخيص كتير رح يصير عند الطفل (تخلف عقلي) يعني حنكون بهرمون ناقص بكلف تعويضوا 100 ل.س، بس حنصير بمشكلة ح يعانوا منها الأهل كل عمرن، طبعاً بالإضافة للمشكلة المستديمة يلي ح يعيشا الطفل باقي حياتوا.
بصراحة وللأسف نحن بسورية ما منسوي اختبار روتيني لكل الأطفال يلي بيولدوا، بس معظم الحالات يلي بتم ولادتا بالمشفى ممكن يتنبهلا دكتور الأطفال يلي بيفحص الطفل أول ما يولد، أما الحالات يلي بتصير فيها الولادة بالبيت فهي غالباً بيتأخر تشخيصا وبتكون النتائج سيئة.

لهون أنا خلصت المعلومات يلي بدي أعطيكن ياها . بتمنى يلي عندو سؤال يسألني.
وبتمنى تعذروني إذا مواضيعي قليلة أو إذا ردودي بتتأخر بس السبب هو ضيق الوقت .
بتمنى الموضوع يكون أثار اهمتامكن
الموضوع الأول يلي حطيتوا قبل هيدا الموضوع هو فرط النشاط ونقص الانتباه عند الأطفال يلي بحب يرجعلوا هيدا هو الرابط.

متلازمة الطفل الشيطان

تحياتي .

rw,v hgy]m hg]vrdm

شكرا للمعلومات أخي ولمجهودك الكبير
جعلها الله في ميزان حسناتك
أبعده الله عن الجميع ,,,,,تحيتي واحترامي

أكيد عزيزي بيكون الموضوع أثر اهتمامنا لان صحتنا بالدنيا

وهي معلومات مفيده وقيمه ولازم ننتبه على انفسنا ونكشف

عند طيب كل بعد فتره وفتره

يعطيك الف عافيه ع جهوودك وهتمامك بمواضيع الصحه

مشكور على المعلومات الرائعة والقيمة

تقبل مروري

u r all welcome

Reem

Moon light

lord halap